Tadewennit d Dr Said Chemakh : « Γas nezger i wasif, mazal yerğa-aɣ yilel. »

Anwa ur nessin Said Chemakh di tesdawit n Tizi Wezzu ! Ma ur t-tessineḍ s lxedma-s, ad t-tissineḍ s nnecraḥa-s : mi t-twalaḍ iεedda, ifassen-is ččuren d idlisen akked lekwaɣeḍ, mi tesliḍ tarbaεt tettaḍsa, ḥsu-k-id yella kra i d-yenna din Chemakh.

Deg yiwen wawal kan, d anwa i Said Chemakh ?

D ccix n tasnilest tamaziɣt di tesdawit Mulud Mεemmri n Tiz Wezzu.

Amek i tewwḍeḍ ɣer twuri-agi ?

Mi kecmeɣ ɣer tesdawit ferneɣ ad ɣreɣ tussna n ugama (biologie), maca tettwanefk-iyi tegnit di 1989 ad ɣreɣ tamaziɣt di L’INALCO (Fransa). Kecmeɣ ɣer din. Ur zmireɣ ara ad qqimeɣ di Lpari imi ur sεiɣ ara ttawil. Uɣaleɣ-d ɣer Tizi Wezzu, ɣriɣ tafransist armi d taragt. Di 1994, qleɣ ɣer L’INALCO, xedmeɣ agerdas n tɣuri lqayen (DEA) ɣef umawal n teqbaylit. Syin rniɣ Dduktura di 2003, ddaw tmehla n Salem Chaker. Asmi i d-yella umkan n useɣri di tesdawit n Tizi Wezzu, kecmeɣ-d bdiɣ sɣarayeɣ .

Maca daɣen kečč d amaru s tmaziɣt…

Nettaru ayen iwumi nezmer ? aseggas-a iεeddan sufɣeɣ-d amud n tullisin “Ger zik d tura” iɣef wwiɣ arraz Mulud Mεemmri di 1993. Mazal llan warraten-nniḍen (ungal, tullisin, …) ad d-ffɣen di lawan iwulmen.

Mass Chemakh daɣen d ameɣnas ɣef tmaziɣt, anda yewweḍ umennuɣ, ass-a ?

Mazal yettkemmil. Skud ur ngi ara ttawilat i tmaziɣt akken ad tidir akin i lqern w-21, mazal ur nḍal ara i tizi. D tidet, yella-d wayen yessefraḥen iseggasen-agi iεeddan maca ixus, ixus aṭas. Γas nezger i wasif, mazal yerğa-aɣ yilel !

D anwa i d amennuɣ iwulmen ihi ?

D asekcem n tmaziɣt di tilibizyuwat, rradyuwat, iɣmisen, Internet, atg. D tasekla ibedden ara ɣren medden deg umaḍal merra, ... D almud s tmaziɣt n tusnakt, takrura, … D tudert s tmaziɣt.

Awal aneggaru a Mass Cemmax.

Tanemmirt i uɣmis n Yimaziɣen imi ur ttun ara tira s tmaziɣt !

Yesteqsa-t Lhocine Ourezki